На Волстрит цените на акциите пораснаа, при што индексот S&P 500 достигна ново рекордно високо ниво, додека инвеститорите ги очекуваа пораките од американската централна банка и деловните резултати од голем број големи технолошки компании.
Dow Jones зајакна 0,59 отсто, на 38.333 поени, додека S&P 500 порасна за 0,76 отсто, на 4.927 поени, а индексот Nasdaq порасна за 1,12 отсто, на 15.628 поени.
Новиот рекорд за индексот S&P 500 е благодарение на позиционирањето на инвеститорите пред серијата вести кои би можеле значително да влијаат на насоката на пазарот.
Оваа недела е првиот состанок на лидерите на американската централна банка годинава. Не се очекуваат промени во монетарната политика, но пораките на ФЕД би можеле значително да влијаат на очекувањата за каматните стапки.
До неодамна се очекуваше дека ФЕД ќе започне со намалување на каматните стапки во март, но по најновите податоци за инфлацијата, економскиот раст и изјавите на неколку лидери на ФЕД, пореално е да се очекува намалување на каматните стапки во мај.
Деловните резултати на најголемите технолошки компании би можеле значително да влијаат на насоката на пазарот. Цените на акциите во технолошкиот сектор силно пораснаа минатата година, благодарение на еуфоријата поттикната од вестите за развојот на вештачката интелигенција (ВИ).
Новите деловни извештаи ќе покажат дали ваквиот раст на цените на акциите бил оправдан.
Во наредните денови квартални резултати ќе објават Alphabet, Microsoft, Apple, Amazon.com, Meta Platforms...
Од компаниите од индексот S&P 500, кои досега објавуваа извештаи, околу 80 отсто од нив оствариле поголема заработка од очекуваната.
„Ова е затишјето пред бурата бидејќи ќе има многу важни вести оваа недела, од состанокот на ФЕД до заработката на компаниите, економските показатели и геополитичките несигурности. И со цените на акциите на рекордно ниво, секое разочарување може да предизвика големи промени на пазарот“, вели Рајан Детрик, стратег во Carson Group.
И на европските берзи вчера претпазливо се тргуваше. Лондонскиот FTSE индекс ослабе за 0,03 отсто, на 7.632 поени, додека франкфуртски DAX се лизна за 0,12 отсто, на 16.941 поен. Парискиот CAC зајакна, пак, за 0,09 отсто, на 7.640 поени.