Footy Headlines, најугледната страница во светот за ексклузивно објавување на новите дресови уште пред да се појават, го откри новото лого за шпанската Ла Лига.
Веќе некое време е познато дека шпанската Ла Лига се ребрендира и ќе го смени логото и визуелниот идентитет. Логото кое се користи 30 години и по кое е препознатлива Ла Лига, заминува во историјата.
Станува збор за повеќебојното тркало кое опкружува фудбалска топка, а под него е испишан „Ла Лига“. Овој симбол нема да се користи од следната сезона.
Актуелното лого ќе се користи до крајот на сезоната, а од сезоната 2023/2024 Ла Лига ќе влезе во нова ера со ново лого, кое веќе го објави Footy Headlines.
Разнобојното тркало ќе биде отфрлено, а бледоцрвена боја ќе го краси новото лого. На новото лого ќе биде испишан зборот „LALIGA“, а на левата страна ќе биде поставен модерниот симбол „LL“, кој означува Ла Лига.
Иако е јасно дека на елитниот шпански фудбал му требаше ребрендирање по 30 години, не сите навивачи се задоволни од промената, со оглед на тоа дека новото лого е премногу тривијално.