Фудбалерот на Барселона Пјер-Емерик Обамејанг ноќеска бил претепан и ограбен во неговиот дом во Кастелдефелс, пренесоа шпанските медиуми.
Според пишувањето на El País, повикувајќи се на полициски извори, најмалку четворица маскирани и вооружени мажи го претепале фудбалерот со метални шипки.
Се заканувале на него и неговото семејство, а потоа им го ограбиле домот. Засега не е познато со какви повреди се здобил фудбалерот.
Медиумите наведуваат дека од домот на 33-годишниот Обамејанг се изнесени големи количини накит и пари. Крадците избегале во бело Audi A3, а сопругата на фудбалерот околу 1 час по полноќ се јавила во полиција.
Покрената е истрага и се трага по напаѓачите.
