Диего Марадона, еден од најдобрите фудбалери на сите времиња, почина во средата во Аргентина на 60 години.
Иако првично беше објавено дека славниот Аргентинец починал од срцев удар, прелиминарниот извештај за обдукцијата вели дека легендарниот фудбалер му подлегнал на акутниот оток на белите дробови предизвикан од хронична срцева слабост. Конечниот резултат од обдукцијата ќе биде објавен по токсиколошки и хистопатолошки тестови.
Пред дваесетина дена, Марадона беше подложен на итна операција за мозочен хематом и по тој повод беше направена последната објавена фотографија со него. Ја објави докторот на Марадона, Леополдо Луке, со што предизвика расправија со семејството на Марадона, на кое не му се допадна објавувањето на фотографијата.
И последната објавена снимка со Марадона е од тој период. Сосетката го снимала како се враќа дома откако беше пуштен од болница на домашно лекување. Нејзиниот син му довикува, а Марадона, кој имаше потешкотии во движењето, му возврати на поздравот, му мавна и со тоа го израдува детето.
