Словенечкиот голман Јан Облак си замисли како би изгледала репрезентацијата на „Плавите“ доколку денес би постоела Југославија, и според него тој тим би бил еден од најдобрите на светот.
По повод екс-ју дерби дуелот Словенија - Србија кој синоќа се играше во Љубљана во рамките на Лигата на нации, голманот Јан Облак даде необично интервју за Sportklub во кое зборуваше и за тоа каква би била денес југословенската репрезентација.
„Не знам, но би можеле да бидеме на врвот на светот. Погледнете ја Србија денес, Хрватска, втората селекција во светот, исто така. Убеден сум, тој тим би изгледал многу моќен! Југославија, сигурен сум, би имала статус на кандидат за освојување на првото место на Светското првенство...“, со насмевка вели голманот на мадридски Атлетико.
Доколку таква репрезентација би постоела денес со сигурност помеѓу стативите би бил токму Облак. Покрај него во тимот би конкурирале играчи како Лука Модриќ, Марцело Брозовиќ, Иван Перишиќ, Анте Ребиќ, Матео Ковачиќ, Шиме Врсаљко (Хрватска), Никола Миленковиќ, Душан Тадиќ, Филип Костиќ, Сергеј Милинковиќ-Савиќ, Александар Митровиќ, Лука Јовиќ, Душан Влаховиќ (Србија), Сеад Колашинац, Миралем Пјаниќ, Един Џеко (Босна и Херцеговина), Стефан Ристовски, Елиф Елмас, Енис Барди (Македонија), Јасмин Куртиќ, Миха Зајц, Андраж Шпорар (Словенија), Адам Марушиќ, Стеван Јоветиќ (Црна Гора), Амир Рахмани, Мргим Војвода, Милот Рашица (Косово), а можеби и играчите кои настапуваат за други држави како Златан Ибрахимовиќ, Дејан Кулушевски, Гранит Џака и Џердат Шаќири во такво сценарио би биле во плавиот дрес.
Навистина, доколку денес треба да се одберат првите 11 на Југославија селекторот би бил на големи, слатки маки.