Португалскиот фудбалер Кристијано Роналдо и официјално е дел од тимот на Ал Наср.
Роналдо потпиша двегодишен договор со кој ќе заработува над 70 милиони евра по сезона.
Португалецот во пресрет на Светското првенство во Катар и официјално го раскина договорот со Манчестер Јунајтед, по што беше поврзуван со бројни клубови, но на крајот ниту еден европски гигант не сакаше да го доведе во своите редови.
Роналдо ја започна кариерата во 2002 година кога стана играч на Спортинг, а во 2003 година беше префрлен во Манчестер Јунајтед. Таму се наметна како еден од најдобрите играчи во светот, ја освои Златната топка и го предводеше овој тим до освојување на Премиер лигата и Лигата на шампионите, а во 2009 година се пресели во Реал Мадрид за 94 милиони евра.
За Кралскиот клуб настапуваше до 2018 година и успеа да стане најдобар стрелец во клупската историја, по што кариерата ја продолжи во Јувентус.
Во сезоната 2021/2022 се врати во редовите на Манчестер Јунајтед, но по расправија со клупските челници и тренерот реши да го раскине договорот и да си ја проба среќата во Саудиска Арабија.
Роналдо во кариерата има постигнато вкупно 819 гола и е на првото место на сите времиња, од нив 450 гола за Реал Мадрид, 145 за Манчестер Јунајтед, 118 за португалската репрезентација, 101 за Јувентус и пет за Спортинг.
Фудбалерот веста ја потврди и на социјалните мрежи каде истакна дека овој негов потег е повеќе од историски, бидејќи ќе ги инспирира сите млади спортисти да бидат уште поуспешни, односно најдобрата верзија од себеси.
„Ова потпишување не само што ќе го инспирира нашиот клуб да постигне уште поголеми успеси, туку ќе ја инспирира нашата лига, нашата нација и идните генерации, момчиња и девојчиња да бидат најдобрата верзија од себеси“, стои во заедничката објава на Роналдо и Ал Наср на Instagram.