Во Франција нема да има професионален спорт најмалку до септември. Ова го објави премиерот Едуар Филип како дел од посериозните мерки во земјата за борба против пандемијата од коронавирусот.
– Големите спортски настани не можат да се одржат пред септември. Професионалната фудбалска сезона 2019/20 не може да продолжи, рече Филип за време на денешното Национално собрание.
Ова значи крај на тековната сезона во првите две нивоа на францускиот фудбал. Се очекува следниот месец да има состанок на француската лига, на кој ќе бидат разјаснети сите прашања во врска со прогласувањето шампион, учесници во европските купови, испаѓање и промоција.
Пред да заврши првенството убедлив лидер во Лиг 1 беше Пари Сен Жермен, а другите две места во Лигата на шампионите ги окупираа Марсеј и Рен. Лил беше на позиција која води во Лига Европа.
Трите екипи во зоната за испаѓање беа Ним, Амјан и Тулуз.
Во Лиг 2, први и втори се Лорјан и Ланс, соодветно, но разликата помеѓу лидерот на табелата и петтиот Клермон е само четири бодови.