На панорамата на Лас Вегас наскоро ќе доминира купола со масивен екран.
Компаниите MSG и Sphere Entertainment започнаа со тестирање на „Sphere“, место со 17.600 седишта во близина на „The Venetian Resort“, кое се состои од џиновска анимирана купола со внатрешен 16K LED екран кој го опкружува. Надворешноста на куполата изгледа привлечно, но главната атракција е всушност во нејзината внатрешност. Куполата е наменета да биде „потопена во жива забава на затворен екран“ и има за цел да го подобри концертното и кино искуство.
Џејмс Долан и Дејвид Дибл од MSG за списанието Rolling Stone изјавија дека целта е ефективно да се создаде VR искуство без „проклети очила“. Креаторите на куполата користат специјална камера за да создадат кадар што ја „обвива“ публиката. Дел од куполата е и уникатен звучен систем со 164.000 звучници, кој може да изолира одредени звуци или дури да ги ограничи на делови од публиката. На пример, еден дел од публиката може да го слушне дијалогот само на шпански.
Како и 4D киното, „MSG Sphere“ има и сетилно искуство за некои посетители. Околу 10.000 седишта нудат хаптика, ладен и топол ветер, како и мириси. Во случај на виртуелно „патување“ на Арктикот, тогаш се чувствува студот додека се гледа содржината.
„MSG Sphere“ официјално ги отвора вратите на 29 септември, кога „U2“ го започнуваат својот 25-ти настап со сопствено производство, а сите карти се веќе распродадени.
Изградбата на куполата започна во 2019 година, но пандемијата и технолошката сложеност ја зголемија цената на 2,3 милијарди долари. Ова ќе биде најскапото место во Лас Вегас досега, бидејќи стадионот „Елиџент“ на НФЛ тимот Лас Вегас Рајдерс чинеше „само“ 1,9 милијарди долари.
Што ќе следи по концертите на „U2“, сѐ уште не е познато, но можно е во куполата да се одржуваат еСпорт турнири и ММА борби.
