Мрежата Стела денеска од 18 до 19 часот и 30 минути онлајн ќе ја одржи втората информативна средба во рамките на проектот „Поддршка на економско јакнење на девојките и жените во руралните средини“.
Овојпат, во фокус се кариерата и образованието во областа на модната и текстилната индустрија, а соговорнички ќе бидат Искра Џокиќ-Кецап, Елена Додевска и Амра Исмани. Тие ќе зборуваат за нивната работа, личниот и професионалниот развој, улогата на формалното и неформалното образование, мотивацијата и менторството при градењето на нивните кариери во оваа индустрија. Дополнително, претставник од Министерството за труд и социјална политика ќе ги промовира активните мерки и можности за самовработување и отпочнување бизнис, велат од Мрежата Стела.
Присутните ќе имаат можност да ги споделат нивните интереси, да дискутираат за пречките и предизвиците со кои се соочуваат девојките и жените во градењето кариера и како локалните заедници може да се вклучат во нивно надминување. Во текот на овие средби, Мрежата Стела ги забележува искуствата и сознанијата за економските потреби и предизвици на жените и девојките во руралните средини, кои потоа ќе бидат споделни со засеганатите страни.
„Дискусија за жени, но не само со жени. Сите заинтересирани се добредојдени!“, порачуваат организаторите и додаваат дека разговорот со соговорничките и публиката ќе се одвива на македонски и албански јазик, а одбирањето на јазик на платформата Zoom ќе биде објаснето пред почетокот на настанот.
„Бидејќи настанот е онлајн, доколку вие или некоја друга личност сакате да учествувате, но немате услови, пишете ни порака на Facebook профилот на Stella и ние ќе се обидеме да ви помогнеме“, објаснуваат од Мрежата Стела во најавата за настанот.
Настанот е во рамки на проектот „Поддршка на економско јакнење на девојките и жените во руралните средини“ кој е поддржан од Цивика мобилитас, програма на Швајцарската агенција за развој и соработка (СДЦ) за поддршка на граѓанското општество во Македонија, која ја спроведуваат НИРАС од Данска, Македонскиот центар за меѓународна соработка (МЦМС) и ФЦГ од Шведска.
Имајќи постојан конфликт во себе си, Елена Додевска како поддржувач на борбата за климатски промени и воедно вљубеник во модата, прави промена на својот кариерен пат.
После нејзиниот ангажман како менаџер заодржлив развој, Елена сега им помага на Fortune 101 корпорациите да ги променат лошите навики, следејќи ги Глобалните цели на ОН за одржлив развој.
Искра е дизајнерка којa твори во полето на мода, театарски костими и текстилни уметности. Добитничка е на стипендија на истражувачки студии за традиционални јапонски техники на боење и ткаење на материјали на престижниот Tokyo University of the Arts.Оттогаш па наваму, портфолиото вклучува работа во текстилната индустрија низ соработка со eвропски модни брендови, дизајнирање театарски костими, дизајн на облека за домашен моден бренд, промоција на свои креации на Fashion Weekend Skopje, како и сликање и боење на материјали за костими.
Оваа приказна започнува со 14-годишна девојка по име Амра, која одбира да се образова и да гради кариера во областа на модниот дизајн. Водена од принципот дека облеката им служи на телата, во 2016 година таа ја создава АРМА, линија на модерна и мултифункционална облека. Таа работи и со приватни клиенти на рачно-изработени парчиња.