Ризикот од државен удар на Руската Федерална служба за безбедност (ФСБ) против претседателот Владимир Путин секоја недела расте додека војната во Украина продолжува, изјави „свиркач“ од самиот врв на руската разузнавачка служба, пренесе Guardian.
„Свиркачот“ Владимир Осечкин тврди дека „безбедносните служби ги зафатиле хаос и незадоволство по неуспешната руска инвазија врз Украина“.
Осечкин е протеран руски активист и основач на група за човекови права, кој тврди дека анонимен руски разузнавач сето тоа го пишува во писмата што ги добива и кои ги објави.
Осечкин за Times изјави дека ризикот што го преземале разузнавачите за да проговорат е знак за нивниот растечки гнев кон Путин и незадоволството од санкциите што ги засегаат агентите на ФСБ кои повеќе нема да можат да одат на одмор во нивните вили во Италија и да си ги носат децата во Дизниленд, Париз.
Говорејќи од неговиот дом во Франција, каде што живее во егзил од 2015 година, Осечкин рече дека „Путин создавал стабилност во Русија веќе 20 години“.
– Службениците на ФСБ, полицајците, државните обвинители – луѓето во системот – можеа да живеат многу добро. Но, сега сето тоа сега го нема. Тие признаваат дека оваа војна е катастрофа за економијата, за човештвото. Тие не сакаат да се вратат во Советскиот Сојуз, додаде тој.
Како што продолжува војната, секоја недела се зголемува можноста за бунт од сите овие неистомисленици во безбедносните служби, истакнува Осечкин.