Цените на акциите на Волстрит нагло паднаа во вторникот, откако претседателот на ФЕД, Џером Пауел изјави дека поради високата инфлација, централната банка најверојатно ќе ги зголеми каматните стапки повеќе од претходно очекуваното. Dow Jones потона за 1,72 отсто, на 32.856 поени, додека S&P 500 падна за 1,53 отсто, на 3.986 поени, а Nasdaq индексот се намали за 1,25 отсто, на 11.530 поени.
Падот на индексот дојде откако Пауел во извештајот до Конгресот за економската состојба рече дека ФЕД е подготвен да преземе повеќе чекори доколку идните економски податоци покажат дека се потребни построги мерки за да се ограничи инфлацијата.
Ова ги поттикна стравувањата на инвеститорите дека централната банка ќе ги зголеми клучните каматни стапки за агресивни 0,50 процентни поени на состанокот во март, бидејќи сите најнови податоци покажуваат дека инфлацијата во САД останува на високо ниво, а економијата продолжува солидно да расте.
Поради ова, пазарот на пари сега проценува дека има 70 отсто шанси ФЕД да ги зголеми каматните стапки за 0,50 процентни поени во март, додека веќе во понеделник тие шанси беа околу 30 отсто.
Пауел, кој утре ќе го продолжи својот извештај до Конгресот, исто така рече дека ФЕД не се откажува од целното ниво на инфлација од 2 отсто и дека трендовите на пазарот на труд не укажуваат на тоа дека економијата е пред пад.
По пораките на Пауел, зајакнати се проценките дека ФЕД ќе ги зголеми каматните стапки на опсег од 5,50 до 5,75 отсто до септември, додека сега каматните стапки се меѓу 4,50 и 4,75 отсто. Сепак, велат аналитичарите, тоа ќе зависи и од дополнителните податоци за инфлацијата и движењата на пазарот на трудот.
Затоа извештајот за вработување во САД во петок ќе биде во фокусот на инвеститорите. Аналитичарите анкетирани од Ројтерс процениле дека бројот на вработени се зголемил за 200.000 во февруари, многу побавно од 517.000 во јануари.
Цените на акциите вчера паднаа и на европските берзи. Лондонски FTSE индексот ослабе за 0,13 отсто, на 7.919 поени, додека франкфуртски DAX се лизна за 0,60 отсто, на 15.559 поени, а париски CAC за 0,46 отсто, на 7.339 поени.