На светските пазари минатата недела цените на нафтата паднаа бидејќи централните банки нема да ги намалат каматните стапки толку брзо како што се очекуваше, па трговците стравуваат од дополнително забавување на економскиот раст, а со тоа и на побарувачката за „црното злато“.
На лондонскиот пазар цената на барелот минатата недела падна за 1,8 отсто, на 82,08 долари, додека на американскиот пазар цената на барелот се намали за 2,5 отсто, на 78,01 долар.
Така, цените минатата недела загубија голем дел од добивката од претходната недела, а трговците беа фокусирани на монетарната политика.
Во извештајот до Конгресот за економската ситуација, претседателот на американската централна банка Џером Пауел рече дека лидерите на ФЕД сакаат да бидат сигурни дека инфлацијата ќе продолжи да слабее кон целното ниво од 2 отсто пред да одлучат да ги намалат каматните стапки.
Коментарите на Пауел ги зајакнаа пазарните проценки дека ФЕД може да започне со намалување на каматните стапки во јуни, подоцна од очекуваното.
А тоа значи дека може да очекуваме дополнително забавување на растот на најголемата светска економија, како и на потрошувачката, па не би требало да се зголемува ниту побарувачката на нафта.
Лидерите на Европската централна банка, пак, очекувано на седницата во четвртокот ги оставија каматните стапки непроменети на рекордно високи нивоа. Сепак, тие сигнализираа дека во јуни може да почнат со намалување на каматните стапки.
Позначителен пад на цената на нафтата спречија податоците за меѓународната трговија на Кина, кои беа подобри од очекувањата. Ова ги поттикна надежите дека закрепнувањето на втората по големина светска економија се забрзува.
Главно поради геополитичките тензии на Блискиот Исток, од почетокот на годинава цената на нафтата на лондонскиот пазар е зголемена за речиси 7 отсто, а на американскиот пазар за речиси 8 отсто, откако минатата година падна за околу 10 отсто.
