Фудбалерите на Палмеирас ја одбранија титулата најдобар јужноамерикански тим откако синоќа во финалето на Копа Либертадорес во Монтевидео го совладаа Фламенго со 2:1.
Палмеирас поведе во 5. минута по фантастичниот контранапад кој во гол го претвори Рафаел Веига. Фламенго, кој беше голем фаворит кај букмејкерите пред финалето, израмни со голот на Габриел Барбоса, кој постигна гол благодарение на слабата интервенција на голманот на Палмеирас и со тоа го внесе натпреварот во продолжение.
Палмеирас дојде до победата во 95. минута благодарение на неверојатната грешка на Андреас Переира, кој е во Бразил на позајмица од Манчестер Јунајтед. Давид Луиз одигра една лесна топка за него, а Переира целосно несфатливо ја загуби рамнотежата и му ја предаде топката на Дејверсон, кој втурна во шеснаесетникот и погоди за големото славје на навивачите на Палмеирас.
Клубот е првиот по Бока Јуниорс (2000 и 2001 година) кој ја одбранил титулата во Копа Либертадорес, а ова е негова трета севкупна титула во ова натпреварување.
