На меѓународниот аеродром во Солт Лејк Сити во САД е пронајден мртов патник. Кајлер Ефинџер (30) од Парк Сити беше пронајден мртов во моторот на авионот.
Полицијата соопшти дека 30-годишникот ја пробил вратата за итен излез, излегол на пистата и влегол во моторот на авионот Airbus A220 лет 2348 на Delta Air Lines со крајна дестинација Сан Франциско, пренесува CNN. Полицајците го пронашле Ефингер во моторот на комерцијален патнички авион полн со патници, соопшти полицискиот оддел во Солт Лејк Сити.
Ефинџер бил патник со билет до Денвер, соопшти полицијата.
Управителот на продавница на аеродромот нешто пред 22 часот им пријавил на диспечерите од контролниот центар на аеродромот дека видел патник како поминува низ излезот за итни случаи. Полицајците бргу ги пронашле облеката, чевлите и другите лични предмети на Ефинџер на една од пистите.
По пронаоѓањето, официјалните лица им рекле на контролорите на летање да му кажат на пилотот да ги исклучи моторите на авионот.
Екипите за итни случаи го извлекле 30-годишникот. Се обиделе да го реанимираат, но сепак на местото на настанот била констатирана смрт кај човекот.
Полицијата во Солт Лејк Сити работи за да ја утврди причината за смртта, пренесува AP.
Кога бил пронајден Ефинџер, на патниците им било кажано да го напуштат авионот, но операциите на аеродромот не биле прекинати, соопшти полицијата.
