Во Перу бројот на починати од последици на коронавирус се зголеми двојно по ревизија на податоците. Со тоа оваа земја има најголема смртност од COVID-19 во светот, по однос на вкупниот број на популацијата.
Официјалниот број на починати од последици од коронавирусот во Перу сега изнесува 180.764, што е огромен пораст во однос на претходниот официјален број од 69.342.
Премиерката Виолета Бермудес пред новинарите изјави дека оваа бројка е собрана според препораките на перуанските и меѓународните експерти.
„Сметаме дека е наша должност да ги објавиме овие ажурирани податоци“, наведе Бермудес.
Перу е една од најтешко погодените земји во Латинска Америка, што резултираше со преоптоварување на здравствениот систем и недостаток на резервоари за кислород.
Пред Перу, Унгарија имаше најголем број смртни случаи по број на жители, околу 300 на 100.000 луѓе. Перу сега има повеќе од 500 починати на 100.000 жители.
Луѓето во Перу веќе подолго време имаа сомнежи во извештаите на Владата и процените за тешката ситуација во земјата поради коронавирусот.