„Претседателот на Русија е безбеден од смртоносната зараза“, тврди Димитриј Песков, портпарол на Кремљ.
Песков вели дека се преземени сите мерки за заштита на Путин од смртоносниот вирус од кој досега починаа над 3.000 луѓе, а заболени се над 93.000 лица.
„Направено е сè што е неопходно за да се спречи вирусот Covid-19 да дојде во близина на претседателот. Говориме за вообичаени превентивни хигиенски мерки кои може да ги примени секој граѓанин на Руската Федерација“, изјави Песков.
Инаку, во Русија повеќе од еден месец никој не може да влезе во Кремљ без претходно да му биде измерена температурата. Во екот на заразата, кога вирусот рапидно се шири низ светот, во Русија се регистрирани само 6 случаи.
Еден од нив е сместен во Москва, станува збор за патник вратен од Италија. Властите во Москва велат дека заразениот покажува благи симптоми и неговата состојба е стабилна.
Преземени се и нови мерки, Русија забрани извоз на маски и медицински производи како антивирусни лекови. Забраната важи до 1 јуни. Од вчера е воведена и построга контрола на патниците во руското метро.
Откажани се и многу настани во училиштата. Владата исто така презеде мерки за спречување на странски државјани да ја посетуваат Русија од земјите во кои има најмногу инфицирани лица, пренесува Russia Today.
До 4 март, во светот има 39.312 активно потврдени случаи на заразени со вирусот. 51.058 луѓе закрепнале, додека 3.204 лица починале.