Двајца индонезиски пилоти спиеле речиси 30 минути врз контролите на авион што летал за Џакарта со повеќе од 150 патници, покажуваат резултатите од истрагата, пренесуваат медиумите во регионот.
Пилотот и копилотот спиеле во исто време околу 28 минути за време на летот на авионот на компанијата Batik Air, кој на 25 јануари полета од градот Кендари во индонезиската југоисточна провинција Сулавеси до главниот град на оваа земја, Џакарта.
Спиењето на пилотите направило авионот да застрани од патеката на лет. Откако се разбудиле го вратиле на предвидената рута и успешно слетале во Џакарта.
За време на лет BTK6723 на авионот Airbus А320, кој траел 2 часа и 35 минути, немало повредени меѓу 153 патници и четворица стјуардеси, јавува Танјуг.
Истрагата открила дека двата пилота не биле одморени пред летот. Копилотот уште во кокпитот пријавил дека имал спиено „само околу половина час“. Но, уморен бил и пилотот кој побарал дозвола од копилотот да дремне. За несреќа, набрзо заспал и копилотот. Контролната кула од аеродромот во Џакарта 28 минути не можела да воспостави контакт со авионот, по што пилотот прв се разбудил и приметил дека авионот застранил од предвидената рута за летање.
Во извештајот од истрагата не се именувани двата пилота, но откриено е дека двајцата се Индонезијци од кои пилотот 32-годишен, а копилотот 28-годишен. Копилотот имал едномесечни близнаци поради кои многупати навечер се будел за да ѝ помага на сопругата.
Двајцата се суспендирани до завршување на дополнителната истрага.
