Северна Кореја упати нови остри критики до американскиот претседател Доналд Трамп, овој пат нарекувајќи го „неизлечиво ментално болен“, непосредно пред неговата прва посета на Азија.
„Трамп ја откри пред светот својата инстинктивна природа на нуклеарен воен манијак и има дијагноза на неизлечиво ментално болен“, објави севернокорејската агенција КЦНА критикувајќи ја, како што рече, работната и неодговорна реторика на „мајсторот за навредување “.
Според најавите, Трамп наскоро ќе ги посети Јапонија, Јужна Кореја, Кина, Виетнам и Филипините, додека сите се во исчекување на пораката што ќе ја упати до Северна Кореја и нејзиниот лидер Ким Јонг-ун.
Трамп и Ким изминатите месеци разменија закани за војна и лични навреди, во повеќе наврати, при што американскиот претседател го предупреди Пјонгјанг на „гнев и оган“, а на заседението на Генералното собрание на Обединетите нации истакна дека Вашингтон целосно ќе ја уништи Северна Кореја доколку мора да се брани себе или своите сојузници.
