Легендата на Франција и на Јувентус, Мишел Платини, покрена тужба против претседателот на ФИФА, Џани Инфантино, за наводно незаконито влијание.
66-годишниот Платини, кој порано беше претседател на УЕФА, објави дека покренал правна постапка против челното лице на светската куќа на фудбалот. Платини го тужи и Марко Филигер, поранешниот директор на правни услуги во ФИФА, кој поранешната фудбалска ѕвезда го посочува како можен соучесник во „злоделата“.
Незаконитото влијание, или прекумерно влијание, се однесува на ветување или давање пари или други предности преку искористување на односите со јавен службеник или службеник во јавна служба.
Според La Gazzetta dello Sport, тужбата на Платини е поврзана со тековна истрага во Швајцарија каде се истражуваат наводни тајни состаноци помеѓу Инфантино и швајцарскиот јавен обвинител Михаел Лаубер помеѓу 2016 и 2017 година.
Лаубер беше на чело на истрагата во ФИФА помеѓу 2015 и 2019 година. Платини и поранешниот претседател на ФИФА, Зеп Блатер, беа осудени за етички прекршоци и суспендирани од фудбалот до 2023 година по откривањето на скандалот со корупција во 2015 година, во време кога поранешната 10-ка на Јуве беше на чело на УЕФА.
Во времето кога Платини беше на чело на УЕФА генерален секретар на ова тело беше токму Инфантино.
