Доста необичен почеток имаше новата сезона во Калчото откако за прв пат по сезоната 1971/1972 ниту еден натпревар од 1. коло не заврши со поделба на бодовите.
Сезоната во Италија почна во саботата попладне, а заврши синоќа вечерта. Се одиграа сите 10 натпревари од 1. коло, а ниту еден не заврши со нерешен резултат, што е доста необично за лигата која го измисли катанаџото.
Продолжениов калчо викенд беа постигнати следниве резултати:
Сампдорија - Аталанта 0:2
Милан - Удинезе 4:2
Монца - Торино 1:2
Лече - Интер 1:2
Лацио - Болоња 2:1
Фиорентина - Кремонезе 3:2
Специја - Емполи 1:0
Салернитана - Рома 0:1
Верона - Наполи 2:5
Јувентус - Сасуоло 3:0
Ваквиот развој на настани го сруши митот старт цели 51 година, дека сезоната на Чизмата не може да почне без ниту едно реми. Последен пат кога вакво нешто се случило во Серија било на почетокот од сезоната 1971/1972, кога исто така немало натпревар со поделба на бодовите. Но, тогаш лигата броела 16 клубови, значи се одиграле 8 натпревари, два помалку од сега - што покажува дека достигнувањето годинава е многу поголемо.
Таа 1971/1972 во 1. коло биле постигнати следниве резултати:
Каљари - Верона 3:1
Фиорентина - Наполи 2:1
Интер - Аталанта 2:0
Јувентус - Катанѕаро 4:2
Мантова - Торино 1:2
Рома - Виченца 1:0
Сампдорија - Болоња 2:1
Варезе - Милан 0:1
Воедно, ова е само четврти пат Серија А да почне без реми бидејќи освен 2022/2023 и 1971/1972 воведно целосно победничко коло се одиграло и во сезоните 1933/1934 и 1934/1935.
Друг куриозитет е што за прв пат во историјата на Серија А победа во 1. коло од новата сезона забележаа првопласираните 8 клубови од претходната сезона, односно Милан, Интер, Наполи, Јувентус, Лацио, Рома, Фиорентина и Аталанта.
