Потпретседателката на Танзанија Самија Сулуху Хасан положи заклетва за претседателската функција денеска, по смртта на претседателот Џон Магуфули, најгласниот ковид-скептик во Африка, со што стана првата жена на чело на оваа источноафриканска земја.
61-годишната Хасан ја презеде функцијата откако завчера беше соопштено дека Магуфули починал од срцев удар, по повеќе од две недели повлекување од јавната сцена.
Исчезнувањето на Магуфули од јавноста на 27 февруари предизвика сомневања дека има COVID-19, болест за која веруваше дека може да се излечи со молитва и не сакаше да нарача вакцини за неговата земја со 58 милиони жители.
Официјалните лица негираат дека какво било заболување е причина за неговото непојавување во јавноста, а Хасан тврди дека нејзиниот претходник починал од срцев удар, додека опозицијата тврди дека починал од коронавирус.
Хасан ја опишуваат како личност која сака да гради договори и компромиси, а нејзиниот стил е спротивен на популизмот на Магуфули, кого го нарекуваа и „Булдожер“ поради неговата нетолеранција на размислувања различни од неговото.
Нејзиниот прекар „Мама Самија“ во земјата е доказ дека населението ја цени.