Канадскиот пејач, текстописец и поет Леонард Коен почина на 82-годишна возраст. Веста беше објавена на неговата официјална Facebook страница, но нема детали за причините на смртта.
„Со жалење ве известуваме дека почина легендарниот пејач и уметник. Изгубивме еден од најценетите визионери во музиката“, се наведува во соопштението. Во наредните денови ќе биде одржана меморијална служба во Лос Анџелес, а семејството ги замолува медиумите за приватност.
Леонард Коен е роден на 21 септември 1934 година во Монтреал. Особено бил фасциниран од песните на Федерико Гарсија Лорка, дури и на својата ќерка и го ставил името Лорка. Во текот на кариерата објавил 14 албуми и е добитник на околу 40 награди, за поезија и музика. Во 2010 година доби Греми награда за животно дело.
Некои од неговите најголеми хитови се „Hallelujah“, „Dance Me to the End of Love“, „Suzanne“, „I’m Your Man“ и други. Минатиот месец го објави неговиот 14 албум наречен „You Want it Darker“, а тогаш најави дека е подготвен да умре.
