Кошаркарите на Сакраменто Кингс славеа на домашен терен против Голден Стејт Вориорс со 126:123 на стартот од НБА плеј-офот.
Де'Арон Фокс одигра брилијантна партија со 38 поени, од кои 29 во вториот дел од натпреварот и ги предводеше „Кралевите“ до голем триумф против актуелниот шампион.
Малик Монк натпреварот го заврши со 32 поена, а Домантас Сабонис имаше 12 поена и 16 скока за домашниот тим, кој се пласираше во плеј-офот за првпат по 16 години.
Стеф Кари ги предводеше Вориорс со 30 поени, Клеј Томпсон додаде 21, а Вигинс и Пул имаа по 18 поени.
Изненадувањето го направија Њујорк Никс кои на гости го совладаа Кливленд Кавалирс со 101:97, а одлични беа Џејлен Брунсон со 27 и Џулиус Рендл со 19 поени.
На домашниот тим не му помогна ниту феноменалниот Донован Мичел со 38 поени, Дариус Гарланд постигна 17 поени, а Џерет Ален имаше 14 поени и 14 скока. Еван Мобли имаше 8 поени при шутирање 4 од 13.
Претходно Џејлен Браун имаше 29 поени и 12 скока, а Бостон Селтикс ја искористи лошата шутерска вечер на Атланта Хокс и победи со 112:99 во првиот натпревар од плејофот на Источната конференција.
Џејсон Тејтум постигна 25 поени, од кои 21 во првото полувреме. Дерик Вајт заврши со 25 поени и 11 скока за Бостон, кој е домаќин на вториот натпревар во вторник.
Дежунт Мареј ги предводеше Хокс со 24 поени, 8 скока и 6 асистенции. Треј Јанг додаде 16 поени.
Џејмс Харден погоди 7 тројки и имаше 23 поени и 13 асистенции, додека Жоел Ембиид постигна 26 поени, а Филаделфија 76ерс лесно го совладаа Бруклин Нетс со 121:101.
На другата страна Бриџис постигна 30 поени за Нетси.
Резултати:
Кливленд Кавалирс - Њујорк Никс 97:101
Сакраменто Кингс - Голден Стејт Вориорс 126:123
Филаделфија 76ерс - Бруклин Нетс 121:101
Бостон Селтикс - Атланта Хокс 112:99
