Градот Скопје започна со реконструкција на пешачкиот мост на Вардар во Општина Центар. Станува збор за еден од објектите чија реконструкција се реализира во рамки на проектот за санација на 36 мостови, надвозници и пешачки натпатници кои се во надлежност на Град Скопје.
Мостот одамна стоеше со лоша подлога од која парчиња недостасуваа, а беше скоро невозможно по него да се помине со велосипед.
„Дел од мостовите и натпатниците и покрај потребата, повеќе децении не се санирани, а неопходни се реконструкции на коловози, огради, пешачки и велосипедски патеки, со што значително ќе се придонесе за зголемување на безбедноста за сите учесници во сообраќајот“, велат од Град Скопје.
„Со системско следење на надлежностите ќе се постигнат позитивни резултати, затоа што за овие инфраструктурни објекти неопходен е континуиран мониторинг со цел навремено санирање и редовно одржување. Реконструкцијата на пешачкиот мост се реализира на децениско барање на граѓаните кои секојдневно го користат, а градежните работи ги изведуваат екипите на скопското јавно претпријатие 'Улици и патишта'“, додаваат од Градот.
Фото: Град Скопје