Во неколку српски градови, Белград, Нови Сад, Врање и Чачак почнаа да се собираат граѓани кои трет ден по ред излегуваат на улиците во знак на протест поради незадоволството од состојбата во државата и најавените нови мерки за спречување на коронавирусот.
Во Белград луѓето полека пристигнуваат пред српскиот Парламент. Некои седат на платото и држат пароли „Не наседнувај. Седни“. Сообраќајот и понатаму се одвива нормално, а некои граѓани им свират од автомобилите во знак на поддршка.
Неколку десетици граѓани се собраа на Плоштадот Слобода во Нови Сад, главно млади луѓе, кои носат различни транспаренти и знамиња, меѓу кои „Срам да ви е“, „За чии деца?“.
Граѓаните, како што беше вчера најавено, бараат оставка од директорот на полицијата Владимир Ребиќ, министерот за внатрешни работи Небојша Стефановиќ, од шефот на државата Александар Вучиќ и од градоначалникот на Нови Сад, Милош Вучевиќ.
Едно од барањата е и распуштање на Кризниот штаб, како и финансиските средства кои се наманети за црквата да се пренасочат за медицинските работници.
На вчерашниот протест во Нови Сад учествуваа повеќе илјади граѓани, а демолирана е Градската куќа, влезот на РТВ и простории на владејачката партија СНС.
Српскиот претседател Александар Вучиќ вечерва изјави дека никој не може на сила да ја преземе власта во Србија, откако народот на избори кажал каква влада сака.
– Мене никогаш нема да ме уплашат и да ме скршат! И главата на трупец да ми е, нема да ме скршат!, рече Вучиќ и и порача на опозицијата дека можат или да победат на избори или да го убијат.
– Јас сум оној кој го избира следниот мандатар. Реално, објективно можат да ме убијат. Но тогаш ќе требаат претседателски избори, бидејќи ќе нема кој да именува мандатар. Не гледам што можат друго да направат, изјави Вучиќ за ТВ Пинк од Париз, пред работната вечера со францускиот претседател Емануал Макрон.
Обраќајќи им се на „сите нормални луѓе, кои се против насилство и дивеење“, Вучиќ им порача да бидат воздржани, да не покажуваат нервоза и да не одат на собири за да не се заразат со коронавирус.
Тој уште еднаш оцени дека протестите во Белград немаат врска со мерките против коронавирусот, туку дека станува збор за желба некои да дојдат на власт без избори.
