Подваријантата на омикрон која, според некои истражувања, би можела да биде позаразна од оригиналната варијанта на коронавирусот, е откриена во 57 земји, соопшти Светската здравствена организација (СЗО).
Варијантата на коронавирус омикрон, која брзо се шири и мутира, стана доминантна варијанта во светот откако за првпат беше откриена во јужна Африка пред десет недели.
Светската здравствена организација во својот неделен епидемиолошки билтен објаснува дека оваа варијанта, која сочинува 93 отсто од сите примероци на коронавирус собрани во изминатиот месец, има неколку подваријанти: BA. 1, BA. 1.1, BA.2 и BA. 3.
Подваријантите BA. 1 и BA. 1.1, првите идентификувани верзии, сега сочинуваат повеќе од 96 проценти од секвенците на омикрон внесени во глобалната база на податоци GISAID.
Но, забележано е очигледно зголемување на бројот на случаи на подваријантата BA. 2, која носи повеќе различни мутации од оригиналната верзија, особено на шилестиот протеин на површината на вирусот неопходен за влез во човечките клетки.
„Секвенците означени како BA. 2 до денеска се внесени во GISAID од 57 земји“, посочува СЗО, додавајќи дека во некои земји оваа подваријанта сега опфаќа повеќе од половина од секвенците на омикрон.
СЗО соопшти дека досега малку се знае за разликите меѓу подваријантите и повика на истражување на карактеристиките на вирусот, особено неговата заразност, неговата способност да ги избегне протеините на имунолошкиот систем и неговата вирулентност.
Неколку неодамнешни студии покажаа дека подваријантата BA.2 е позаразна од оригиналниот омикрон.
Марија Ван Керхове, една од главните експерти на СЗО за ковид, во вторникот им рече на новинарите дека сè уште има малку информации за подваријантите, но дека некои првични податоци покажаа дека BA.2 има „малку зголемена стапка на раст во споредба со BA.1“. .
Омикрон главно предизвикува поблаги форми на болеста од претходните варијанти на коронавирусот, а Ван Керхове рече дека досега ништо не покажало дека подваријантата BA.2 би била поопасна.
