Протести против американската полиција избувнаа во неделата во Минесота откако полицаец застрела млад Афроамериканец.
Убиениот маж го запрел своето возило за сообраќаен прекршок на околу 16 километри од местото каде што беше убиен Џорџ Флојд за време на апсењето во Минеаполис минатиот мај.
Гневни толпи народ се собраа пред полициската станица во Бруклин Центар вчеравечер, а полицајците во целосна заштитна опрема испукаа гумени куршуми и шок-бомби кон демонстрантите.
Гувернерот на Минесота, Тим Валц, го идентификуваше човекот убиен од полицијата како Данте Рајт (20). Тој рече дека ги набљудува протестите во Бруклин Центар, предградие на Минеаполис, „додека нашата држава жали за уште еден црн живот однесен од полицијата“.
Антиполициските демонстранти претходните денови веќе ги минаа протестирајќи во Минеаполис, додека судењето на Дерек Шовен, поранешен полицаец, влегува во третата недела од судењето, под будното око на Националната гарда.
Шовен се товари дека го убил Флојд клекнувајќи му со колено на вратот, поради што Афроамериканецот изгубил здив и проток на кислород, за време на апсење во мај минатата година. Видеото од инцидентот предизвика глобални протести против полициската бруталност.
Мајката на Рајт, Кети Рајт, им изјави на новинарите дека добила повик од нејзиниот син во неделата попладне и ѝ рекол дека полицијата го запрела затоа што имал освежувачи за воздух обесени на ретровизорот, што е нелегално во Минесота. Можела да ја слушне полицијата како му кажува на нејзиниот син да излезе од возилото.
„Слушнав расправија и полицаец кој рече ‘Данте, не бегај’“, рече таа низ солзи. Повикот завршил, а таа повторно се јавила на бројот на нејзиниот син, на што одговорила неговата девојка, велејќи дека тој е мртов на возачкото место.
Во соопштението од полицијата од Бруклин Центар стои дека полицајците го запреле Рајт нешто пред 14 часот за сообраќаен прекршок и откриле дека против него има отворена потерница. Додека полицијата се обидувала да го уапси, тој се вратил во автомобилот. Еден полицаец пукал кон него. Рајт успела да помине неколку улици возејќи, а пото удрил во друг автомобил и починал на самото место.
Полицијата соопшти дека камерите на телото на двајцата полицајци го снимиле инцидентот. Државната канцеларија за криминалистичко истражување го истражува пукањето.