Нов инцидент во кој полицијата уби осомничен при апсење ги потресе САД, каде со денови се одржуваат протести против полициската бруталност по убиството на Џорџ Флојд во Минесота.
Инцидентот се случил завчера во Валјехо, град северно од Сан Франциско, Калифорнија, објави LA Times. Полицијата соопшти дека застрелано е 22-годишно момче осомничено за пљачкање во насилните протести.
На прес-конференција, еден од полицајците кој бил на местото на инцидентот, Шони Вилијамс, изјави дека полицијата примила повик за пљачкање на продавница на Walgreens во понеделникот вечерта. Втор повик стигнал во вторникот околу пладне, кога било пријавено пљачкање на аптека. Неколку минути по вториот повик пред продавницата на Walgreens стигнало полициско возило.
Шони Вилијамс
Убиеното момче денеска е идентификувано како Шон Монтероса. Тој пред продавницата на Walgreen прво тргнал кон возило со кое полицајците сметаат дека планирал да бега, потоа клекнал на колена, и почнал да ги крева рацете нагоре, при што од џебот на дуксерот се покажала рачка на чекан за која полицајците сметале дека е пиштол. Полицајците утврдиле дека во тој момент претставува закана и еден од полицајците испукал пет куршуми во насока на момчето, низ стаклото на полициското возило. Еден го погодил Монтероса и тој подоцна починал во болница.
Шон Монтероса
Подоцна било утврдено дека Монтероса носел чекан, а не огнено оружје. Шефот на полицијата на Велјехо изјави дека неговите најелитни полицајци се обучени да пукаат низ автомобилско стакло и дека таа постапка е дозволена според правилата на полициската служба.
Адвокатот на семејството Монтероса, Џон Барис, има друга верзија на настаните.
„Ова е невидено. Полицаецот не бил во животна опасност. Монтероса сакал да се предаде. Своеволно клекнал и ги кренал рацете за да се предаде. Монтероса не им се заканувал на полицајците, клечел со кренати раце. Полицаецот кој пукал бил во полициското возило. Монтероса ниту му се приближувал, ниту му се заканувал. Кражба не е оправдана причина за убиство. Тоа е само имот“, рече тој.
