Скопје, 19 февруари 2020 (МИА) – Во селото Крушопек во скопски Сарај во тек е полициска акција и се прават претреси во врска со недозволена трговија со дрога, потврди МВР за МИА.
Од Министерството посочуваат дека мерките се преземени по насока од јавен обвинител и по наредба од судија на претходна постапка.
Засега не се соопштува за каква дрога се работи и за колкаво количество, а според објавите во некои медиуми станува збор за голема пратка кокаин што наводно требало да се транспортира во Словенија.
Акцијата со претреси во Крушопек поради недозволема трговија со дрога ја потврди и министерот за внатрешни работи Наќе Чулев, кој на Facebook објави дека „Министерството за внатрешни работи во овој момент презема широк спектар на оперативни мерки и активности“.
-По насоки на јавен обвинител и по наредба на судија на претходна постапка се вршат претреси на подрачјето на село Крушопек во близина на Скопје поради недозволена трговија со дрога. Целиот капацитет на Министерството за внатрешни работи е ставен во заштита на граѓаните и безбедноста на државата. Помина времето кога високото раководство во МВР соработуваше и ги поддржуваше криминалните структури во државата. Повеќе информации за јавноста ќе соопштиме во текот на утрешниот ден, напиша Чулев на Facebook.
