Полската влада одлучи да ги изгради своите први нуклеарни централи, а договорот за изградба на првата е доделен на американската компанија Westinghouse Electric, објави новинската агенција PAP по владиниот состанок во Варшава.
Овој договор се надоврзува на договорот од 2020 година меѓу Вашингтон и Варшава за комерцијална употреба на нуклеарна енергија.
„Не треба да се потпираме само на докажана технологија, туку и на докажани партнери“, рече премиерот Матеуш Моравјецки.
Првата нуклеарна централа ќе биде во близина на Гдањск
Првата нуклеарна централа ќе биде изградена во Лубијатово-Копалино на брегот на Балтичкото Море во Померанското војводство, северозападно од Гдањск. Таму ќе бидат изградени три реактори AP1000, а првиот треба да започне со работа во 2033 година.
Втората електрана ќе биде проект на корејска компанија и полски компании, рече Моравјецки. Засега нема информации за евентуален трет проект во централна Полска, иако интерес за учество во изградбата пројави и Франција.
Во 80-тите, во близина на Гдањск започна изградбата на нуклеарна централа со советски дизајн, но таа никогаш не беше завршена поради протести. Денес, електраните на јаглен задоволуваат околу 70 отсто од потребите за електрична енергија на Полска.