Полски медиуми јавуваат дека неколку свештеници во градот Даброва Горница организирале оргии во зграда што ѝ припаѓа на парохијата.
Според локалните медиуми, секс-забавата се случила во стан кој го користел свештеник. На оргиите имало и жиголо, кој изгубил свест и првично му била ускратена лекарска помош, пишува порталот Notes from Poland.
Поради оргијата во базиликата, полскиот бискуп Гжегож Кашак напиша писмо во кое јавно се извини за „болните настани во епархијата“. Писмото на бискупот беше прочитано на миса во црквите низ епархијата.
Обвинителството најави истрага за овој настан, а што се случило не соопштуваат ниту црквата ниту обвинителството. Локалната епархија соопшти дека некои аспекти од медиумските извештаи се неточни.
Минатата недела, Gazeta Wyborcza, водечки либерален дневен весник, објави дека свештениците во Даброва Горница, град во Јужна Полска, организирале забава во парохиска зграда на која бил поканет жиголо.
„Настанот беше чисто сексуален по природа“, изјави за весникот неименуван извор запознаен со инцидентот. „Учесниците земаа лекови кои ја зголемуваат потенцијата.“
Gazeta Wyborcza објави дека „забавата излегла од контрола и машката проститутка изгубила свест“, што предизвикало повик во Брза помош. Меѓутоа, кога пристигнале болничарите, им било забрането да влезат во просториите. Болничарите потоа, наводно, повикале полиција, која им помогнала да стигнат до онесвестениот маж.
Портпаролот на локалното обвинителство за Gazeta Wyborcza изјави дека е започната истрага за можното неукажување помош на лице чие здравје е загрозено, што е кривично дело казниво до три години затвор.
Како одговор на прашањата на весниците, локалната католичка курија потврди дека имало инцидент со „интервенција на службите за итни случаи и полицијата во зграда што ѝ припаѓа на парохијата“. Се вели дека бискупот назначил комисија итно да објасни што се случило.
Куријата во следното соопштение објави дека „досегашните наоди на комисијата се разликуваат од информациите презентирани од некои медиуми“, иако не даде никакви дополнителни детали.
Во четвртокот вечерта некој ја запалил вратата од базиликата во парохијата каде што се случил наводниот инцидент. Пожарникарите го изгаснале пожарот и нема повредени. Полицијата подоцна приведе маж осомничен дека го подметнал пожарот.
Во петокот куријата објави дека свештеникот Томаш З., во чиј стан се случил наводниот инцидент, бил отстранет од сите црковни должности „до расчистување на работата“.
Во меѓувреме, неделниот католички магазин Niedziela објави дека ја прекинал соработката со Томаш З., кој претходно беше главен уредник на неговото локално издание Sosnowiec.
