Легендарниот НБА тренер Грег Попович долги години е во кошарката, но вели дека нема видено почудна повреда од онаа на ѕвездата на неговиот тим, Кавај Ленард.
Тој се повреди во минатогодишниот плејоф и сите очекуваа да се врати за почетокот на сезоната, но Ленард ќе биде оддалечен од терените уште некое време.
Грег Попович во интервју за ESPN ги искажа маките околу физичката подготвеност на неговиот тим, и покажа загриженост за ѕвездата на Сан Антонио Спарс, Кавај Ленард.
„Немам видено почудна повреда. Она што е најчудно е дека Тони Паркер ја имаше истата повреда, но неколку месеци подоцна. Тој дури беше и на операција, и засега Тони е поблиску до враќање на теренот отколку Ленард. Имаме двајца играчи кои страдаат од истата повреда, неверојатно“, изјави Грег Попович
Кавај Ленард се повреди во минатогодишниот плејоф натпревар против Голден Стејт Вориорс, кога при еден доскок нагази на ногата на Заза Пачулија и го повреди зглобот.
„Ќе се врати, порано или подоцна. Се чувствувам како политичар кога го кажувам ова. И вие знаете дека ништо не знам, туку дека се работи за проценка“, одговори во негов стил Попович.
Двократниот освојувач на наградата „Одбранбен играч на годината“ во минатата сезона беше и еден од тројцата главни кандидати за освојување на МВП трофејот, но на крајот пресуден беше трипл-дабл просекот кој го оствари Расел Вестбрук и Ленард остана без престижното признание.
