Cyberpunk 2077 стана една од најдобрите игри на пазарот денес. Дистопискиот град Night City остави малку луѓе рамнодушни.
Сепак, не беше се така прекрасно на почетоците на играта. Cyberpunk 2077 беше објавена во катастрофална состојба, полна со проблеми и неигривост на конзолите PlayStation 4 и Xbox One. За неполни три години, овој наслов претрпе трансформација и ги исправи сите проблеми кои го нарушија угледот на играта и развојното студио CD Projekt Red.
Во 2022 година, играта доби аниме верзија наречена Cyberpunk: Edgerunners. Оваа анимирана серија се состои од 10 епизоди и стана една од најдобрите што индустријата може да ги понуди. Критичарите ѝ дадоа 100% оценка на Rotten Tomatoes, додека публиката ѝ даде малку пониска оценка - 95%. Најголемите комплименти за анимето одат за прекрасните визуелни слики и одличната приказна.
После Edgerunners, Cyberpunk 2077 конечно ќе добие играна верзија, но сè уште не е познато дали ќе биде ТВ-серија или филм. На проектот ќе работи компанијата Anonymus Content, најзаслужна за серии како Mr. Robot и True Detective и филмовите The Revenant и Spotlight.
Како продуценти на овој проект се наведени Гарет Кембл, Дејвид Левин, Рајан Шварц и Бард Дорос. Се очекува многу блиска соработка меѓу продуцентите и CD Projekt Red, поврзана со неименуваниот проект. Ова ќе се разликува од The Witcher на Netflix, кој серијата ја базираше на романите на Анджеј Сапковски, а не на игрите на полското студио за развој.
Уште е рано за избор на актери, сценаристи и режисер. Сепак, продуцентите на проектот имаат на располагање двајца можни актери - Кијану Ривс и Идрис Елба, кои веќе имаат свои улоги во Cyberpunk 2077.
