Засилената активност на Етна резултираше со тоа вулканот да порасне неколку метри, па денес висок е 3.357 метри, објави италијанскиот Институт за вулканологија.
„Активностите на Етна во текот на 2021 резултираа со насобирање на поголеми количини материјали и слоеви на лава на конусот на југоисточниот кратер, најмладиот и најактивен од четирите кратери на врвот на Етна, што доведе до значителни трансформации на вулканот“, стои во соопштението на Националниот институт за геофизика и вулканологија.
Благодарение на анализа на сателитски снимки, научници од Институтот заклучија дека југоисточниот кратер сега е повисок од оној на североистокот, кој во последните четириесетина години важеше за највисок врв на познатиот вулкан.
Податокот за надморската висина од 3.357 метри, со плус или минус три метри, е добиен благодарение на снимки од сателитот Pleiades.