Порториканците се на чекор до рефендум за тоа дали островот треба да стане американска сојузна држава, независна држава или да има друг вид на уредување откако Претставничкиот дом на Конгресот на САД денеска ќе гласа за предлог-законот кој ќе го реши ова прашање.
Комитетот на Претставничкиот дом во средата го одобри Законот за статусот на Порторико, отворајќи пат за гласање во Претставничкиот дом.
Законот ги поставува условите за референдум како и трите потенцијални самоуправни статуси: независност, полноправна сојузна држава или суверенитет во слободен сојуз со САД.
Таков систем владее во Микронезија, Палау и Маршалските Острови.
Порторико, каде што живеат околу 3,3 милиони луѓе и владее голема сиромаштија, е американска територија од 1898 година. Активисти веќе со децении се залагаат за поголема политичка слобода, вклучувајќи и независност. Од 60-тите години на минатиот век се одржани 6 референдуми на оваа тема, но ниту еден од нив не беше задолжителен. Само Конгресот ја има моќта да додели статус на државност.
„По 124 години колонијализам, Порториканците заслужуваат фер, транспарентен и демократски пороцес за конечно решавање на прашањето за статусот“, порача на Twitter пратеничката Нидиа Веласкес од демократите.
Жителите на овој карипски остров се Американци, но немаат право на глас во Конгресот, не можат да гласаат на претседателските избори, не плаќаат сојузен данок на добивка заработен на островот и немаат еднакви услови за некои сојузни програми како останатите граѓани на САД.
Ако предлог-законот помине во Претставничкиот дом потоа ќе бидат потребни 60 гласови во Сенатот и потпис на демократскиот претседател Џо Бајден за да стане закон. Законот ја има поддршката на пратениците од двете страни, како и од претставниците на Порторико.
Времето истекува бидејќи пратениците имаат полн дневен ред пред божикниот одмот на крајот од наредната седмица. Новиот Конгрес заедно со Домот под контрола на републиканците ќе положи заклетва на 3 јануари, кога овој и секој друг законодавен процес ќе мора да почне од почеток.