Нова студија ја дели дебелината во две групи, секоја со поинакви ефекти на функционирањето на телото. Ова откритие би можело да резултира со персонализиран начин на лекување на оваа состојба, пишува Science Alert.
Во овој момент, дебелината се дијагностицира со користење на индекс на телесна маса, но тимот зад ова истражување вели дека таквиот пристап е премногу едноставен и дека постои ризик од погрешни процени поради игнорирање на индивидуални биолошки варијации.
Еден од новоидентификуваните типови на дебелина карактеризира поголема маса на масно ткиво, а втората и повеќе маснотии и помалку мускулна маса. Истражувачите откриле дека вториот тип дебелина е поврзан со поголем ризик од воспаленија што го зголемува ризикот од рак и од останати болести.
„За првпат гледаме дека постојат барем два различни метаболички подвидови на дебелина, секоја со свои физиолошки и молекуларни поединости кои влијаат на здравјето. Ако овие наоди се преведат во клинички употреблив тест тоа би им помогнало на докторите подобро да се грижат за пациентите“, вели генетичарот Џеј Ендру Посписилк од Институтот Ван Андел во Мичиген.
Научниците набљудувале податоци од 153 близнаци, собрани во склоп на истражувачкиот проект TwinsUK и откриле четири метаболички подвидови кои влијаат на телесната маса: два се склони кон слабеење, а два кон дебелеење.
Дебелината се дефинира како прекумерно насобирање на масно ткиво во телото поради зголемен број на масни клетки или поради зголемување на нивниот волумен.
Истражувањето „ Independent phenotypic plasticity axes define distinct obesity sub-types“ е објавено во научното списание Nature Metabolism.