Италијанскиот фудбалер Марио Балотели го раскина договорот со швајцарскиот Сион и повеќе не е член на овој клуб.
Како што соопшти Фабрицио Романо, Балотели денеска и официјално се согласил да ја прекине соработката со овој тим, а што се однесува до иднината и каде би можел да се види во наредниот период, се наведува дека неговиот поранешен тим Адана Демирспор е подготвен да го врати во своите редови.
Балотели пристигна во Сион во август минатата година, имаше краток подем, но работите повторно тргнаа во „надолна линија“, па често беше надвор од теренот поради лошите игри и расправиите.
Станува збор за фудбалер кој ретко беше константен по заминувањето од Ливерпул во 2016 година, па играше во Ница, Марсеј, Бреша, Монца и Адана Демиспор.
Претходно се споменуваше дека кариерата би можел да ја продолжи во Саудиска Арабија, но се чини дека Турција и враќањето во неговиот поранешен клуб е пореална дестинација за него.
Што се однесува до кариерата во Швајцарија, Балотели за овој тим одигра вкупно 19 натпревари, постигнувајќи 6 гола и добивајќи дури 9 жолти картони.
Балотели кариерата ја започна во Интер, од кој се пресели во Манчестер Сити и во овој клуб го играше најдобриот фудбал во животот. Потоа следеше враќање во Италија, поточно во Милан, а потоа и трансфер во Ливерпул.