Килјан Мбапе го очекуваат уште тестови следната недела, по повредата со која се здоби на вчерашниот натпревар против Сент-Етјен.
ПСЖ потврди дека Мбапе има „сериозна повреда, истегнување на десниот скочен зглоб“. Младиот напаѓач беше повреден по грубиот старт врз него од страна на Лоик Перан.
„За 72 часа повторно ќе му биде направена проценка, откако ќе стигнат анализите“, додадоа од клубот.
Мбапе на штаки ја прослави вчерашната победа со која ПСЖ го освои Купот на Франција.
Рано утрово Французинот на Twitter напиша дека се разбудил „како победник“.
„Ви благодарам на сите за пораките, длабоко сум трогнат. Бакнежи до сите, имајте убав викенд“, порача Мбапе.
Претходно, новинарот на RMC Мохамед Бухафси на Twitter објави дека по првичните тестови, утврдено е дека Мбапе има „големо истегнување на скочниот зглоб, но дека нема скинати лигаменти“.
Неизвесно е кога следен пат ќе заигра Мбапе - за една недела доаѓа финалето на Лига купот против Лион на 31 јули, а екипата на Томас Тухел е и во 1/4-финалето на ЛШ против Аталанта на 12 август.
