Црешите се сезонско овошје, но доколку правилно ги складирате можете во нив да уживате во текот на целата година.
Речиси и да нема домаќинство што нема замрзнувач. Во нашето секојдневие, големите замрзнувачи значително ја намалуваат потребата семејствата да стават зимница во вид на купишта тегли со ајвар, кисели краставички или компоти.
Сè повеќе луѓе претпочитаат да чуваат овошје и зеленчук во замрзнувач, сирови или по минимална термичка обработка, колку за да ги зачуваат.
Причина за тоа е фактот што замрзнувањето во голема мера го зачувува квалитетот на вкусот и корисните својства на овошјето и зеленчукот, а овозможува конзумирање на сезонски производи во текот на целата година.
Добрата вест за љубителите на црешата е што може да се чува и во замрзнувач. За замрзнување се користат здрави цели плодови од ова сочно овошје.
Плодот внимателно се мие, се цеди и се чисти од стебленцата, а по желба и од семките. Потоа лесно префрлете ги во кесичките за замрзнување, но внимавајте да не пренатрупате за да не се згмечат. Полека истиснете го воздухот и ставете ги во замрзнувачот. Вака подготвените цреши може да се чуваат во фрижидер од 8 до 12 месеци.
Се одмрзнуваат на собна температура и можат да се користат при подготовка на џем од цреши, како и при подготовка на разни видови шејкови, сирупи, смути, колачи, сладолед и разни други десерти.
