Иако сезоната во најдобрата македонска фудбалска лига веќе почна, по четири кола ФФМ и Arena Sport постигнаа договор за вршење преноси во наредните две сезони.
Фудбалската федерација на Македонија и Arena Sport се договорија 1.МФЛ да се врати на малите екрани со два натпревара во живо од секое коло за сезоните 2023/2024 и 2024/2025. А, пак, Arena Sport и МРТ постигнаа договор за соработка со тоа што МРТ ќе ги снима и емитува натпреварите, а Arena Sport како носител на ТВ правата ќе бира кои натпревари ќе одат во живо. Натпреварите исто така ќе се емитуваат на МРТ. Всушност, тоа е истиот концепт кои беше и со претходниот договор.
Овој договор не важи за домашните натпревари на АП Брера Струмица и Вардар, кои имаат договор за емитување на нивните натпревари со Sportklub. Затоа, во преносите се враќа Шкендија, чиј договор со каналот Supersport истече и истиот не е продолжен.
Засега не е познато дали преносите ќе почнат од викендов, кога се игра последното коло пред репрезентативната пауза, или откако ќе заврши прозорецот на УЕФА, што е поверојатно сценарио.
Овој договор на ФФМ со Arena Sport значи дека лесно може да се случи во еден викенд да имаме дури 4 преноси од македонската лига. Имено, бидејќи Arena Sport има два преноса (еден во сабота и еден во недела), а често Вардар и АП Брера Струмица се домаќини во исто коло и нивните натпревари одат на друг канал, тоа може да доведе до голем избор за гледачите крај малите екрани.
