Инспиративната и емотивна промоцијата на авцтобиографијата „Мојот сон“ од д-р Џемиле Берат го преполни фоајето во НУ „Центар за култура“ во Крива Паланка.
Во својата автобиографија Џемиле го слика животот и соживотот во Крива Паланка, како база, срж на сиот животен потенцијал што ќе ја однесе преку трнливиот пат- до успехот.
„Никогаш, ама никогаш не се предавајте. Работете упорно, мотивирано, гледајќи само напред, чекорејќи со сигурни, цврсти чекори и со сигурност ќе го остварите вашиот сон“, порача д-р Берат.
Книгата говори и за нејзиниот брат Себо и сопругот Бајрам - клучни фигури, поддршка на тој нејзин пат до успехот.
„Успеав и затоа што имав среќа да се родам и да растам во Крива Паланка, меѓу моите паланчани, да учам од старите паланчани со човечки вредности, почит, разбирање, соживот меѓу Ромите и Македонците. Време во кое вратата не се заклучуваше, се позајмуваше, даваше, децата се дружеа, немаше поделби и разлики, учителките имаа улога на втори мајки. Прекрасни сеќавања, горда сум што се родив и израснав тука“, рече Џемиле.
Нејзината хуманост е она што ја одбележа промоција во родната Крива Паланка, на која со симболични донации за книгата се собраа средства за поддршка на еден одличен ученик, полуматурант од локалното ООУ „Илинден“, како и двајца ученици, по еден од ромска и албанска етничка припадност во Скопје. Таква беше желбата на д-р Берат, финансиски да им помогне на тројца одлични ученици (Македонец, Ром и Албанец) кои живеат со самохрани мајки.
Промоцијата беше дел од програмата на манифестацијата „Крива Паланка - Град на културата“.
Инаку, автобиографијата „Мојот сон“ ќе се продава во книжарниците на Топер, а ќе може да се набави и на нивниот штанд на претстојниот Саем на книгата, кој ќе се одржи од 18 до 24 април во СЦ „Борис Трајковски“ во Скопје.
