Актуелната пандемија со COVID-19 инспирираше бројни уметници да ја претстават ситуацијата низ призмата на нивниот медиум.
Филмот „Birdsong“, чиј продуцент е Мајкл Беј, доби многу медиумска покриеност уште кога почна да се снима во мај, како првиот високобуџетен филм што се снимаше во филмската индустрија во Лос Анџелес во време на пандемија.
Вчера беше објавен трејлерот за филмот во кој мутиран подвид на коронавирус наречен COVID-23 го опустошува светот.
Првиот трејлер за пандемскиот трилер го прикажува светот заробен во пандемија веќе четири години, а во една година смртниот биланс бележи 8,4 милиони жртви.
Дејството во филмот се случува во 2024 година, а во него играат Кеј Џеј Апа и Софија Карсон, кои играат двојка разделена од пандемијата, чија љубовна приказна се одвива во услови на воена состојба.
Нико, ликот на Апа тврди дека е имун на вирусот, што може да му помогне додека ја бара неговата девојка, Сара, која е принудена да ја напушти безбедноста на нејзиниот стан откако нејзиниот сосед ќе се зарази со вирусот.
„Тоа е дистописки, застрашувачки свет, но истовремено и романтичен филм за две лица кои сакаат да бидат заедно, но не можат“, изјави режисерот Адам Мејсон за Entertainment Weekly.
„Ова се пандемиските Ромео и Јулија, раздвоени од вирусот“, вели Мајсон.
Филмот има и исклучителен кастинг за споредните улоги: Деми Мур, Бредли Витфорд, Крег Робинсон, Александра Дадарио и Пол Волтер Хаузер.
Премиерата се очекува во 2021 година, но уште не е објавен точен датум.
