Од денеска, на задоволство на скопјани, повторно е во функција жичницата до врвот на Водно.
По година и пол скопјани конечно повторно ќе можат да ги користат услугите на жичницата „Милениумски крст“ која од Средно Водно води до врвот Крстовар.
Жичницата беше ставена вон употреба како последица на мерките за заштита од ширење на коронавирусот некаде пролетта 2020 година. Потоа иако се отворија кафеаните, рестораните, диксотеките, спортските сали... жичницата воопшто не проработе.
„ЈСП ги заврши сите неопходни процедури за пуштање на жичницата во функција од технички и безбедносен аспект. Во изминатиот период направен е редовен годишен преглед од овластена институција, мониторинг од страна на Државен инспектор за жичници како и редовен технички преглед“, соопшти денеска градоначалничката на Скопје, Данела Арсовска, која и прва ја извозе трасата до Крстовар.
Воедно, во оптек се пуштени и трите автобуски линии до Средно Водно (25, 25А и 25Б).
Жичницата беше пуштена во употреба на 3 јуни 2011 година. Вкупниот капацитет на жичницата е 1.160 патници на час. Располага со 28 кабини за по 8 патници и 2 кабини за 4 патници. Се движи со брзина од 6 метри во секунда и должината ја совладува за 4 минути и 18 секунди.