Судечкиот совет ги одби приговорите на адвокатите на обвинетите во случајот „Труст“ бомбите да не бидат изведени како доказ на главната расправа, по што на два звучника во судницата беа пуштени три снимени телефонски разговори од кои два се меѓу Кирил Божиновски, поранешен секретар на Владата, и Влатко Чинговски, поранешен директор на ЕЛЕМ, а еден меѓу Никола Груевски и Влатко Чинговски.
Во разговорите помеѓу Божиновски и Чинговски се слуша како тие се договараат за условите за добивање на тендерот од конзорциумот за ископ на јаглен и јаловина во РЕК Битола. Чинговски во првиот разговор на Божиновски му вели: „Условите да бидат како што нив им одговараат“.
Во разговорите Божиновски и Чинговски разговараат со шифри употребувајќи прекари „братот од југот“, „битолчанецот“, „кратовецот“… Божиновски му вели на Чинговски дека има стратешки план како да ги задоволат за добивање на тендерот. Чинговски посочува дека се видел со лица од конзорциумот и се договориле за условите.
Во разговорот со Чинговски, Груевски вели се видел со кратовчанецот и дека му дал некои идеи. Потоа Груевски вели дека се видел и со оној што има автомобил „сеат ибица“.
Судијката закажа осум рочишта за „Труст“ за јануари и февруари и покрај тоа што одбраната се противеше. Судењето е во фаза на доказна постапка и на следните рочишта ќе бидат презентирани доказите на одбраната.
Според обвинението на СЈО, конзорциум составен од три фирми, со фалсификувана документација добивал тендери во ЕЛЕМ и со тоа се здобил со противправна корист во износ од над една милијарда денари или околу 17 милиони евра. Набавката по тендерот се случила во текот на 2011 година. Конзорциумот бил составен од Трансмет ДЕО од Скопје, Силекс Неметали од Кратово и Вато ДЕО од Студеничани. Освен Сеад Кочан, во предметот се обвинети и Василије Авировиќ и Сафет Ватиќ.