Рускиот претседател Владимир Путин соопшти дека Русија ги насочува трговијата и извозот на нафта кон Бразил, Индија, Кина и Јужноафриканска Република и притоа ги критикуваше западните земји поради новите санкции наметнати на Москва.
Путин во виртуелно обраќање на бизнис Форумот на БРИКС ги критикуваше санкциите.
„Новите санкции воведени од политички мотиви противречат на здравиот разум и елементарната економска логика“, изјави Путин.
Соопшти дека поради тоа Русија „активно ги насочува трговските врски и надворешните економски контакти кон меѓународни партнери кои се сигурни, пред сè земјите на БРИКС.
„Испораката на руска нафта расте во Индија и во Кина. Соработката во земјоделието се развива динамично“, изјави Путин и додаде дека расте и извозот на руско ѓубриво кон земјите на БРИКС.
Според податоците на Кинеската царинска управа, увозот на сирова нафта во Кина од Русија порасна за 55 проценти за разлика од претходната година. Русија ја замени Саудиска Арабија и стана главен набавувач на Кина.