Рускиот претседател Владимир Путин вети вчера дека ќе распореди свои војници и оружје во близина на границата со Финска по нејзиниот пристап во НАТО, објави Al Jazeera.
Путин рече дека влезот на Финска и Шведска во НАТО е „бесмислен чекор“, додавајќи дека Русија ќе распореди трупи и системи за уништување на границата со Финска по пристапувањето во алијансата минатиот април.
„Ова е апсолутно бесмислен чекор за Финска и Шведска од гледна точка на обезбедување на сопствените национални интереси“, изјави Путин за руската државна новинска агенција РИА и за државната телевизија „Русија-1“ во едно широко интервју.
„Немавме војници на финската граница, а сега тие ќе бидат таму. Немаше систем за уништување таму, сега тие ќе се појават“, додаде тој.
По започнувањето на руската офанзива во Украина пред повеќе од две години, Шведска ја напушти својата долгогодишна неутралност и се приклучи на НАТО во четвртокот, станувајќи најновата членка на организацијата.
Откако Унгарија, последната од 31 земја на алијансата која го одобри влезот на Шведска во НАТО, го поднесе својот документ за ратификација, членството стана официјално, објави Politico.
Шведска сега е целосно покриена со членот 5 од алијансата, кој бара од сите други членки да се бранат меѓусебно во случај на напад. Соседот на Шведска, Финска е членка на алијансата од 4 април минатата година. Со двете нордиски земји во алијансата, НАТО го контролира речиси целото Балтичко Море.
Во Шведска се присутни и силна индустрија за оружје и добро опремена војска. Земјата има намера да потроши 2,1 отсто од БДП за одбрана оваа година, приближно двојно повеќе отколку во 2020 година и повеќе од целта на НАТО, според Politico.
