Рускиот претседател Владимир Путин денешните разговори со американскиот колега Џо Бајден ги оквалификува како „конструктивни“.
Тој рече дека разговорите не биле непријателски, туку всушност биле прилично конструктивни, при што обете страни покажале подготвеност меѓусебно да се разберат.
Тој го опиша Бајден како искусен државник.
„Два часа разговаравме, тоа е нешто што не може да го направите со повеќето политичари. Тој значително се разликува од поранешниот претседател Доналд Трамп“, оцени Путин.
Путин изјави дека со американскиот претседател се договорилеза враќање на амбасадорите. За потсетување, рускиот амбасадор во САД Анатолиј Антонов и американскиот амбасадор во Русија Џон Саливан се повлечени во матичните земји во последните месеци поради зголемените тензии меѓу САД и Русија.
Во разговорите е разгледувана и стратегија за нуклеарната стабилност, регионалните конфликти како и трговските прашања.
Русија и САД, според Путин, се договориле за почеток на консултации за сајбер-безбедноста.
Рускиот претседател рече дека на средбата едвај станало збор за опозиционерот Алексеј Навални, кој е во затвор, при што воопшто не му изговори името, туку на него посочи како на „тој човек“.
