Пожарот кој усмрти 64 лица во шопинг центар кој се наоѓа во Кемерово во Русија е резултат на „негрижа и немарност“, изјави рускиот претседател Владимир Путин, за време на својата посета на овој град.
Меѓу 64 починати има многу деца, а од полицијата тврдат дека алармот бил исклучен, а излезите биле блокирани кога избил пожарот во шопинг центарот во неделата.
Причината за пожарот се уште не е официјално соопштена, но рускиот Комитет за истраги пренесува дека се работи за „сериозни прекршоци“, пренесува „BBC“.
„Ова не беше борба или неочекувана експлозија на метан во рудник. Луѓе и деца дојдоа да се опуштат. Овде зборуваме за губење на многу животи, а зошто? Поради немарност и негрижа“, изјави Путин.
Пожарот се случи на горниот кат во трговскиот центар, во време кога продавниците и киното беа полни со луѓе. Некои од нив скокаа низ прозорци, за да се обидат да се спасат.
Комитетот за истраги соопшти дека техничарот го исклучил алармот откако бил известен за пожарот, односно дека била отворена истрага.
Досега се уапсени пет лица, вклучувајќи го и човекот кој го исклучил алармот.
Поради затворените излези комплексот се претворил во смртоносна замка, а немало ниту организирана евакуација.
