Организацијата за економска соработка соопшти дека Австралија, Швајцарија, Шведска, Нов Зеланд и Канада се добри земји за висококвалификувани работници, каде се нудат добри услови за работа и добра работна средина.
Во анализата биле опфатени 36 земји, а еден од заклучоците е дека Израел, Јапонија и Турција може да привлечат повеќе висококвалификувани работници ако ги подобрат условите.
Сепак, за државјаните на Република Северна Македонија, како земја која не е членка на ЕУ, заминувањето на работа во странство е малку потешко, особено имајќи предвид дека Европа и целиот свет се соочуваат со пандемија на COVID-19.
Ако сте размислувале за заминување во странство на легален начин, со македонски пасош и претходно најдено сигурно вработување, можеби сте налетале на сајтот ec.europa.eu/eures. Таму можете да најдете вработување во разни земји преку некој од објавените огласи, согласно вашето образование и квалификации.
На пример, за заминување во Шведска потребен ви е само пасош, а останатите услови се договараат со работодавецот, со оглед на тоа дека за оваа земја нема иселеничка виза.
Најбарани профили на работници во Шведска се стоматолози, книговодители, готвачи, пекари, молери, градежни техничари и инженери, електроинженери, како и ИТ стручњаци.
Ако сте заинтересирани за работа во Германија, посетете го сајтот www.jobboerse.arbeitsagentur.de, каде најголема е веројатноста да најдете огласи за следните работни места: ИТ сектор, машински инженери, електроничар, електричар, електроинсталатер, водоинсталатер, лекар, медицински сестри и негуватели на стари луѓе и болни деца.
