Поради неправилности во работењето, утврдени од вонредниот инспекциски надзор од Министерството за култура, Сашо Ристовски денеска беше разрешен од функцијата директор на НУ Театар Комедија.
При надзорот е утврдено дека директорот на театарот презел обврски над одобрените средства од Министерството за култура во вкупен износ од 8.734 486 денари во изминатите три години, без притоа истите да ги обезбеди од други извори, соопштуваат од Министерството.
Со ваквото работење, Ристовски направил повреда на чл.70 а, став 4 од Законот за култура.
До изборот на нов директор, заради непречено фунционирање на оваа установа, за в.д. директор е назначена Нора Шаќири Марковиќ, вработена во маркетинг службата во театарот. Од Министерството велат дека наскоро ќе биде распишан конкурс за избор на постојан вршител на должноста директорна НУ Театар Комедија.
Ристовски е роден на 21.02.1980 година во Скопје. Дипломирал на Нов бугарски универзитет – Софија, Република Бугарија. Во периодот 2013-2017 година е член на ансамблот на Охридскиот театар – НУ Центар за култура „Григор Прличев“ – Охрид. Од 4 август 2017 година е член на ансамблот на НУ Театар Комедија Скопје, а на 17 ноември 2017 од страна на Министерството за култура на Република Македонија е назначен за в. д. директор на НУ Театар Комедија. Бил и советник во Кабинетот на Министерот без ресор задолжен за дијаспората Едмонд Адеми во Владата на Република Македонија.
Веб-страницата на Театар Комедија е недостапна, а во описот на дејноста на театарот на неговата официјална Facebook страница стои дека директор е актерката Јелена Жугиќ, која беше разрешена од директорската функција во јули, 2017 година со решение од тогашниот министер за култура Роберт Алаѓозовски.
